चंद्रपूर पोलीस दलात मोठे फेरबदल; रामनगर आणि राजुरा पोलीस स्टेशनला मिळाले नवे कारभारी
चंद्रपूर:
चंद्रपूर जिल्हा पोलीस दलात प्रशासकीय कारणास्तव मोठे फेरबदल करण्यात आले असून, जिल्ह्यातील तीन पोलीस निरीक्षकांच्या बदल्यांचे आदेश पोलीस अधीक्षक मुम्मका सुदर्शन यांनी निर्गमित केले आहेत. या बदल्यांमध्ये प्रामुख्याने रामनगर आणि राजुरा यांसारख्या मोठ्या आणि संवेदनशील पोलीस स्टेशनचा समावेश असून, या निर्णयामुळे पोलीस वर्तुळात मोठी चर्चा रंगली आहे.
महत्त्वाच्या बदल्या आणि नवीन जबाबदाऱ्या:
पोलीस अधीक्षक कार्यालयाने जारी केलेल्या आदेशानुसार, रामनगर पोलीस स्टेशनचे विद्यमान पोलीस निरीक्षक आसिफराजा शेख यांची बदली आता राजुरा पोलीस स्टेशन येथे करण्यात आली आहे. आसिफराजा शेख यांचा अनुभव दांडगा असून, यापूर्वी त्यांनी जिल्ह्यातील घुग्गुस, बल्लारपूर आणि रामनगर सारख्या महत्त्वाच्या ठाण्यांमध्ये यशस्वीपणे काम पाहिले आहे.
दुसरीकडे, जिल्हा विशेष शाखेत (DSB) कार्यरत असलेल्या पोलीस निरीक्षक प्रभावती एकुरके यांची नियुक्ती आता रामनगर पोलीस स्टेशनच्या प्रभारी अधिकारी पदी करण्यात आली आहे. विशेष म्हणजे, आसिफराजा शेख सुट्टीवर असताना त्यांच्या पदाचा अतिरिक्त पदभार प्रभावती एकुरके यांच्याकडेच होता. आता त्यांना अधिकृतपणे या ठाण्याची जबाबदारी सोपवण्यात आली आहे.
खाकीतील ‘पॉवर कपल’: शहराच्या सुरक्षेची धुरा पती-पत्नींच्या हाती
या बदली आदेशातील सर्वात लक्षवेधी बाब म्हणजे चंद्रपूर शहरातील दोन अत्यंत महत्त्वाच्या पोलीस स्टेशनची कमान आता एकाच कुटुंबातील दोन कर्तव्यदक्ष अधिकाऱ्यांकडे आली आहे. शहर पोलीस स्टेशनचे प्रभारी अधिकारी म्हणून निशिकांत रामटेके कार्यरत आहेत, तर आता त्यांच्या पत्नी प्रभावती एकुरके यांच्याकडे रामनगर पोलीस स्टेशनची सूत्रे सोपवण्यात आली आहेत. पती-पत्नी एकाच वेळी शहरातील दोन मुख्य पोलीस ठाण्यांचे नेतृत्व करण्याची ही जिल्ह्यातील दुर्मिळ घटना मानली जात आहे.
प्रशासकीय फेरबदल:
याच आदेशान्वये, पोलीस निरीक्षक अमोल बारापात्रे यांची नियुक्ती जिल्हा विशेष शाखा (DSB), चंद्रपूर येथे करण्यात आली आहे. पदोन्नतीने पदस्थापना मिळाल्यानंतर त्यांची ही नियुक्ती करण्यात आली असून, जिल्ह्याच्या गुप्तचर आणि विशेष मोहिमांच्या नियोजनात त्यांची भूमिका महत्त्वाची ठरणार आहे.
आगामी काळ लक्षात घेता, कायदा व सुव्यवस्था अबाधित राखण्यासाठी हे फेरबदल अत्यंत महत्त्वाचे मानले जात आहेत. सर्व संबंधित अधिकाऱ्यांना तात्काळ नवीन ठिकाणी रुजू होण्याचे निर्देश पोलीस अधीक्षकांनी दिले आहेत.
सदर बातमी ही आमच्या अधिकृत माहिती स्रोत आणि गोपनीय माहितीच्या आधारे तयार केली आहे. कृपया कोणीही कॉपी करून पुर्नप्रकाशित करू नये.
